O Rasoeiro visita a complicada cancha do Atlético Novás B na procura dun terceiro triunfo
AROUSA
Tras comezar con mal pé a Liga da Primeira Autonómica de balonmán, o Rasoeiro empezou a superar as súas tres derrotas de partida con outros tantos resultados positivos. Ao empate e dúas vitorias das últimas semanas, os homes de Óscar Arosa pretenden sumar hoxe un terceiro triunfo. O Atlético Novás B, no Rosal, é o atranco (18 horas) .
O adestrador grovense salienta a dificultade de superar a un conxunto que aproveitará a xornada de descanso na Liga de Primeira División Nacional para contar cos cinco efectivos que alternan o filial co equipo de referencia. Entre eles, catro homes que, sostén Óscar, poden resolver un partido de Primeira Autonómica por si sós: o central César, os laterais Manu e Harrys, e o estremo Pablo.
Ademais de parar o ataque do Atlético Novás B, ao técnico do Rasoeiro preocúpalle a posible permisividade arbitral cun conxunto que na súa cancha é coñecido pola súa defensa agresiva. «No perder balones en ataque, y estar acertados en el lanzamiento». Por aí comeza o camiño do éxito no Rosal segundo Óscar.
Os seareiros do club Rasoeiro poden ver hoxe os seguintes partidos no pavillón do Monte da Vila: Rasoeiro-Caselas (Primeira Autonómica Feminina, ás 18 horas); Rasoeiro-Pabellón (Xuvenil Fem., 20 horas); e Rasoeiro-Lavadores (Cadete Fem., 12.15 horas).