O grupo ribeirense Os Chiquilicuatres puxo á venda un lapis óptico cos temas do seu primeiro traballo
18 mar 2008 . Actualizado a las 02:00 h.Os seguidores do grupo ribeirense Os Chiquilicuatres xa teñen á súa disposición o seu primeiro traballo discográfico. Trátase dun conxunto de temas agrupados baixo o título Delitos de autor , que está á venta en dous formatos, no tradicional cedé e nun lapis óptico. Este último sistema ten a particularidade de que os seus posuidores poderán ampliar e renovar o contido cada vez que acudan a un concerto da banda.
O lapis inclúe fotografías do grupo, vídeos e cancións, ao tempo que contén unha carpeta extra na que se poderán ir incorporando temas ou concertos. De feito, as persoas que acudiron o pasado fin de semana á Festa da Chuvia, na que foi presentado este traballo discográfico, xa tiveron a posibilidade de gravar a actuación que ofreceu a banda.
Ademais, Os Chiquilicuatres apostaron por rexistrar este primeiro traballo na sociedade Reative Communs, o que significa que a súa reprodución nos locais que o desexen non implicará o pago de dereitos de autor.
Primeira actuación
Con tantas facilidades, está claro que os seguidores da banda integrada por Fernando Peón, Alberto Millán, Fernando Pérez e Suso Bello non teñen escusa para escoitar os seus temas sempre que o desexen. De feito, un bo número de persoas presenciaron o concerto que o grupo ofreceu no Ateneo Valle-Inclán, unha actuación de unha hora de duración que moitos optaron xa por incluír no seu lapis óptico.
Aínda que o traballo Delitos de autor está tamén dispoñible en formato cedé, Suso Bello está convencido de que o que realmente vai funcionar é o lapis: «A sociedade camiña de xeito rápido cara as novas tecnoloxías e por iso nos decatamos por este sistema. Tamén lle queremos dar facilidades á xente que no futuro queira facerse coa nosa música, xa que só terá que pagar o soporte e gravará os temas e os concertos gratis».
Cada actuación dos Chiquilicuatres é un espectáculo diferente. A conseguir isto contribúen os diversos instrumentos musicais que emprega a banda. Entre eles destaca un pandeiro que Suso Bello toca cos pés e que foi inventado pola banda. Os catro ribeirenses utilizan ata paus de escoba en moitos dos seus concertos.