Tres axentes velarán porque a cita coa bici do domingo en Cee transcurra sen contratempos
25 jun 2010 . Actualizado a las 02:00 h.A Policía Local de Cee implícase na celebración do Día da Bicicleta de Cee, que organizan La Voz de Galicia e Radio Voz e que arrancará este domingo, ás once da mañá, do Centro Comercial Finis Terrae. Jesús Manuel García Leal é un dos tres axentes que formarán parte do dispositivo.
-¿Como organiza o percorrido a Policía Local?
-Aportamos tres axentes e dous vehículos para coordinar o dispositivo de seguridade con Protección Civil. Cubriremos os cruces máis importantes para que non pase nada. Un coche da policía irá diante do pelotón e outro, da policía ou de Protección Civil, pechará a marcha.
-¿Hai algún punto especialmente complicado?
-É un paseo, non unha competición, e non haberá problema ningún. O máis conflitivo son as estradas comarcais, pero estarán todas controladas. Temos todo xa preparado, o domingo pola mañá reunirémonos todos os que participemos no dispositivo para falar dos detalles. Tamén está previsto que nos axude a Garda Civil de Tráfico.
-¿Que lle parece a cita coa bici?
-Eu, sempre que podo, cando non traballo, participo, e animo a todos os que poidan a participar no Día da Bicicleta, é un día moi apetecible para sacar a bici, e moi entretido.
-¿Como ve o percorrido?
-É longo, durará entre dúas horas e media e tres horas porque a xente vai ao seu ritmo. Imos ata Pereiriña para volver a Cee por Toba e Camiños Chans.