O escritor asegura que o Igaem non quixo representar a peza tras ser galardonada co Álvaro Cunqueiro
24 oct 2007 . Actualizado a las 02:00 h.Rubén Ruibal gañou o Premio Nacional de Teatro, pero como de dramaturgo se vive mal, defínese como amo de casa e agricultor a tempo parcial. Ruibal gañou o premio por unha obra premiada anteriormente co Cunqueiro e que foi publicada por Xerais, pero permanece sen representar. Limpeza de sangue sitúa a Ruibal como o segundo galego que consigue un Premio Nacional, despois de Manuel Lourenzo. Ruibal asegura que lle «ferve o cerebro de tanto falar polo móbil». Descartou por prudencia que a chamada do ministro de Cultura «fose broma de algún colega» antes de poñerse a pensar nas repercusións que o premio pode ter. Para o escritor este galardón «era impensable», pero non cre que acabe por darlle «máis visiblidade como dramaturgo do que a inmediatamente mediática». Tamén por prudencia considera que non espera «que se desperte agora un gran interese pola obra, unha vez que pase o follón».
Limpeza de sangue foi Premio Cunqueiro, agora é Premio Nacional, pero segue sen ser representada. Ruibal atribúe esta situación a varias causas, a primeira «é que o Igaem non quixo cumprir as bases do premio e decidiu non representala». A segunda ten que ver coa configuración do sistema teatral en Galicia. Ruibal sinala que en Galicia «case todos os dramaturgos teñen compañía, así que estrean textos propios, parece lóxico que non se interesen nos dos demais, as compañías sen dramaturgos prefiren autores coñecidos ou directamente clásicos». Ruibal, sen deixar a ironía da súa obra, di que «a terceira razón imos ter que preguntarlla a Iker Jiménez».
Para o dramaturgo ábrense posibilidades de tradución e entende que sería lóxico que houbese un lugar para o seu libro nas outras linguas peninsulares. Pero por diante disto Ruibal pediría primeiro que «a obra chegase aos escenarios». Asegura que os dramaturgos escriben para ser representados antes que outra cousa e que este texto «foi pensado para un escenario». Sinala que cando escribiu Limpeza de sangue pensou «nas limitacións que ten a escena, en non usar excesivos personaxes e non complicar o número de cambios». Admite que oito actores «é un reparto amplo, pero o CDG ten traballado este mesmo ano con elencos máis grandes».
Rubén Ruibal destacou que esta premiada obra procede da «escola Roberto Vidal Bolaño», con quen traballou como actor en Teatro do Aquí. Ruibal sinala que, «se cando escribín o texto xa era unha homenaxe a el, agora o premio tamén ten que ser unha homenaxe a Vidal Bolaño».