A Coruña, hoxe, e Celanova, mañá, conmemorarán con actos o cabodano do escritor
07 mar 2008 . Actualizado a las 02:00 h.Galicia leva cen anos sen Curros Enríquez. Hoxe hai un século que o escritor morreu na Habana e, desde aquela, a súa figura non ten deixado de medrar como exemplo dunha literatura galega, cívica, laica e de acción. Este fin de semana, Galicia celebra a Curros Enríquez no centenario do seu cabodano en tres puntos distantes: A Coruña, Celanova e A Habana. En Cuba, cun programa que desde o mércores repasa polo miúdo o labor desenvolvido polo autor durante os anos que residiu na illa. O programa desenvólvese en varias institucións, entre elas, a universidade. A Coruña reparte entre recitais, ofrendas florais e visitas ao cemiterio de San Amaro a celebración de hoxe. Organizado pola Fundación Curros, a Real Academia, a Concellería de Cultura e a Asociación da Prensa da Coruña, o programa terá como puntos fundamentais as xeografías coruñesas relacionadas co escritor. A celebración servirá ademais para presentar o Premio Celanova, Casa dos Poetas.
Mañá, Celanova asumirá o protagonismo. Organizada pola Secretaría Xeral de Comunicación e pola fundación do escritor, a xornada ten unha vindicación clara da faceta menos coñecida de Curros, o xornalismo. Gregorio Ferreiro e Fernando Salgado explicaron onte en Compostela o porqué de recuperar un labor que ocupou unha parte importante da vida do escritor e indicaron que «a importancia da obra poética ocultou un traballo que Curros desenvolveu desde os 16 anos». Salgado sinalou, como estudoso do escritor, que se pode entender a Curros «como o primeiro periodista moderno de Galicia». O secretario xeral anunciou que Curros Enríquez será o primeiro autor antologado dunha serie de libros que publicará a secretaría con obra de periodistas galegos.