O cambio de gañador do González Garcés «foi unha decisión máis xurídica que literaria», apunta o xurado
CULTURA
«Fui unha decisión máis xurídica que literaria». Así explicaban onte membros do xurado do premio de poesía Miguel González Garcés o acordo do mesmo de cambiar o gañador deste galardón aludindo ao incumprimento das bases da convocatoria.
Un asesor xurídico da Deputación coruñesa acompañou en todo momento aos membros do xurado e «indicounos que se rexeitabamos a impugnación que presentou o finalista o asunto acabaría nun xulgado, que sería o que tomara a decisión final».
Isto contaban onte membros dun xurado do que era presidente o máximo responsable da Deputación provincial coruñesa, Salvador Fernández Moreda (que non exerceu o seu dereito a votar en ningunha das reunións do xurado), e que estaba formado por escritores de recoñecido prestixio como Manuel Álvarez Torneiro, Manuel Fernández Álvarez Forcadela, Remedios Fernández Romero, Gonzalo Navaza e Luz Pozo Garza.
O anonimato
Outra das opcións que tiñan era «aterse estritamente ás bases do premio» segundo as cales «o máis grave era a cuestión do anonimato», xa que Eduardo Estévez, a quen o xurado dera como gañador do premio o pasado 27 de maio, era o autor dun blog en Internet, chamado En construción, no que aparecían versos do poemario que posteriormente foi o galardoado, xunto co seu nome.
Os membros do xurado recoñecían onte que non sabían da existencia desta bitácora e indicaron que outra das obras presentadas a este premio foi desestimada «porque parte dela estaba publicada nunha revista». De todo os xeitos, consideran que este é un feito pouco habitual, e indican que a decisión de aceptar a reclamación que presentou o finalista, Xavier Lama, foi tomada por unanimidade do xurado, mentres que a de concederlle o premio ao propio Lama, que nun principio fora finalista co poemario Cabalos do alén , foi tomada por catro votos a favor e un en contra. Lama insistiu en que lle parecía «escandaloso» que se premiara unha obra que levaba dous anos colgada en Internet.
Eduardo Estévez explicou tamén onte que a opción que tiña agora era a de presentar un recurso contencioso administrativo e ir ao Tribunal Superior de Xustiza de Galicia, que acabaría decidindo o gañador, «pero non o vou facer, polo mesmo que non me parece elegante o que fixo Lama». Cualificou o ocorrido de «antecedente perigoso», polo que supón «xudicializar os premios literarios».