O autor fai unha «recreación memorial» da transición política española desde o punto de vista dun xornalista
12 nov 2008 . Actualizado a las 02:00 h.O vixésimo premio de narrativa Torrente Ballester xa ten nome e apelidos: Carlos González Reigosa. O escritor e xornalista lucense acadou este galardón grazas ao seu traballo A vida do outro , que conseguiu o voto unánime de todos os membros do xurado, que elixiron este libro entre un total de 404 obras presentadas á edición deste ano.
Salvador Fernández Moreda, presidente da Deputación (institución que outorga o galardón), mostrou a súa satisfacción porque o premio vaia a parar ás mans «dun ilustre galego, un magnífico periodista e un escritor de prestixio, que escribe tanto en galego como en castelán, e que estivo vinculado a esta casa». O dirixente provincial tamén destacou o feito de que esta obra fose seleccionada co voto a favor de todos os membros do xurado e de que estivese escrita en galego, xa que nesta lingua só se presentaron 28 traballos. Neste sentido, Fernández Moreda destacou que tamén foi seleccionado como finalista o traballo Socorro , do poeta Diego Doncel.
O catedrático de literatura Ángel Basanta foi o encargado de falar en nome do xurado desta edición, e sinalou a grande calidade da obra de González Reigosa, quen recibirá un premio de 25.000 euros, ademais da publicación do libro. «A novela gañadora eu diría que é unha recreación memorial da transición política española e mundial contada por un xornalista (fillo de galegos e membro da xeración do 68), que chega ata onte mesmo, posto que remata no ano 2007», definiu Basanta.
Desencanto
O portavoz do xurado tamén destacou a gran transformación que experimenta o protagonista da obra de González Reigosa, «membro dunha xeración que triúnfa e que incluso chega a dirixir un importante xornal a nivel nacional, pero que por dentro se vai enchendo de oco, de baleiro. El non quere ese triunfo e acaba deixándoo todo e regresando á casa dos seus devanceiros».