O paso por terras dezanas da selección española de balonmán será lembrado como un fito histórico en Lalín, e máis aínda entre os amantes do balonmán. O Club Balonmán Lalín, o máximo expoñente local de dito deporte, valorou positivamente o paso da selección pola capital do Deza e o partido oficial co que se inaugurou o Lalín Arena, pero tamén puxo un pero.
Dende o BM Lalín agardaban que a selección española se implicase máis coa canteira do club e que atopase un oco na axenda destes catro días para adicar un anaco aos rapaces do club. «Entendemos o que se están xogando, e dende logo damos grazas porque viñeran, xa que hai un ano era algo impensable, pero unha vez que estiveron aquí, gustaríanos telo aproveitado máis», sinalaban dende o BM Lalín. O club lalinense, que deixou claro que esta era unha cuestión totalmente allea ao Concello, puxo como exemplo que «o BM Lalín nin sequera se puido facer unha foto co equipo». Consideran ademais que é o combinado nacional en si mesmo é o maior expoñente do que dispón o deporte do balonmán para crear afición e fomentar a práctica da disciplina.
Á marxe do papel da selección, no BM Lalín no agochaban certa decepción ao ver que «empresas que a nós nos negaron ata o carné de socio, estaban anunciadas no Lalín Arena o día do partido». Pola contra, o club gabou a implicación de Embutidos Lalinense, «un gran espónsor».