O derbi local entre Clínica Deza Xabañús e o Balonmán Deza decantouse a favor do segundo por un marcador 23-25 que deixa entrever a igualdade que presidiu todo o encontro. O trunfo do cadro que adestra Sergio Guerra xestouse nos últimos compases do encontro, nos que o BM Deza puxo máis intensidade e ganas.
Todo o choque estivo determinado pola igualdade; na primeira metade o cadro que exercía de visitante adiantouse no luminoso uns minutos, pero o Xabañús deulle a volta ao marcador e foise ao descanso cun gol de rédito. Trala reanudación comezou un toma e daca que semellaba condenado a táboas; sen embargo, no tramo final do encontro o BM Deza apurou o ritmo de xogo e logrou encadear catro lanzamentos exitosos que lle permitiron adiantarse no marcador. De aí ao pitido final só se rexistraron ataques longuísimos, ao borde do pasivo, e que serviron aos de Sergio para manter as distancias.
Tralo encontro, Paco Vilariño apuntaba que a vitoria se decantara a prol do equipo que puxera máis da súa parte. O adestrador entende que a súa defensa non estivo á altura, e o xogo ofensivo fraqueou. Pola súa banda, Sergio recoñeceu que a súa escuadra partía cunha dose extra de motivación, e achacou á defensa do seu equipo o resultado. «La clave creo que estuvo en que fuimos capaces de defender bastante bien sus ataques, muy lentos y con gente de calidad».
Os outros resultados
A vitoria de onte foi a primeira do BM Deza esta tempada, e chega logo de que os de Sergio asinasen o sábado o seu primeiro punto da Liga. Os lalinenses empataron 30-30 na casa ante o Tirso de Molina nun partido que tiveron que remontar, e no que acusaron problemas de lesións na portería.
En canto ao Xabañús, o cadro lalinense impúxose 41-35 ao Bueu, ata entón líder, nun partido perfecto en ataque, pero cunha defensa moi frouxa.