«Isto é un atraco a man armada e un novo regalo do Estado ás poderosas empresas hidroeléctricas»
GALICIA
Castrelo de Miño é un lugar común na memoria colectiva dos galegos. Nos anos sesenta os veciños e os sindicatos agrarios mobilizáronse contra Fenosa para non perder un dos vales máis fermosos e produtivos da denominación de orixe Ribeiro. Da represión e violencia con que foron tratados, en pleno franquismo, aínda dan conta algunhas obras literarias e cancións. Agora verán rebaixados substancialmente os ingresos polos impostos que paga o encoro. Xurxo Rodríguez é o alcalde de Castrelo.
-¿Como lle vai afectar a Castrelo de Miño a rebaixa do IBI acordada polo Goberno?
-De forma contundente e brutal. Nós somos un concello duns 2.000 veciños e temos un presuposto de 1,2 millóns de euros. Ata o de agora ingresábamos por este concepto -o IBI do encoro- 240.000 euros e, a partir deste ano, ingresaremos uns 50.000 euros. Unha rebaixa de 190.000 euros sobre 1.200.000 euros é un pau moi grande. De feito é o noso ingreso máis importante.
-¿Haberá un recorte dos servizos municipais?
-Veremos que pasa, mais faise difícil atender a demanda nun municipio con tanta dispersión e tan extenso.
-¿Que opinión lle merece esta reforma?
-Isto é un atraco a man armada e un novo regalo do Estado ás poderosas empresas hidroeléctricas, como o da subida da tarifa eléctrica ou o da supresión da tarifa nocturna. E feito dunha forma sospeitosa, xa que aos concellos non se nos deixou participar nin presentar alegacións nas valoracións catastrais.
-¿Confía en que se poida corrixir esta situación?
-Niso estamos e de aí xorde a iniciativa presentada no Senado por Xosé Manuel Pérez Bouza. O que queremos é que se garantan os ingresos e se rexeite ese decreto que vai contra os principios da autonomía local, a suficiencia financeira e os ingresos consolidados.
-¿A vía legal será a saída?
-Dende a Federación Estatal de Concellos con Encoros non queremos chegar a iso, mais semella que só nos vai quedar recorrer á vía xudicial para reclamar os nosos dereitos.