María Castro, actriz galega da serie «Sin tetas no hay paraíso», será pregoeira da Feira do Viño de Quiroga
LEMOS
A comisión organizadora da Feira do Viño de Quiroga escolleu como pregoeira da vixésima sexta edición deste festexo gastronómico á actriz viguesa María Castro, que interpreta actualmente un dos principais papeis da serie de Telecinco Sin tetas no hay paraíso . A actriz ten raíces familiares no municipio, xa que súa nai é natural da localidade de Santa Cubicia, situada na parroquia de Hospital, e exerceu como mestra rural en diversas poboacións quiroguesas.
María Castro, coñecida tamén pola súa participación en diversos programas e series de TVG, pronunciará o pregón da feira o 22 de marzo, ás oito da tarde. A súa relación familiar con Quiroga foi descuberta polos organizadores do festexo despois de solicitar a súa participación no programa de actos. «Ao principio chamámola simplemente por ser unha actriza galega moi coñecida e para nós foi toda unha sorpresa saber que era oriunda do municipio e que ten aquí moitos parentes», explica o alcalde Julio Álvarez. O mandatario puntualiza non obstante que as personalidades designadas para pregoar o festexo gastronómico son escollidas máis en función da súa popularidade e da repercusión que poidan darlle á feira de Quiroga que pola súa orixe xeográfica ou familiar. En ocasións anteriores foron pregoeiros da feira de Quiroga os xornalistas Matías Prats e Lydia Lozano e as presentadoras de televisión Paula Vázquez e Silvia Jato, entre outros coñecidos personaxes.