Unha excursión organizada polo colectivo Os Lactouros achou un artefacto prehistórico nun camiño de Sober
23 mar 2008 . Actualizado a las 02:00 h.Un achado casual durante unha excursión de sendeirismo por Sober acaba de proporcionar unha nova e interesante pista aos científicos que desde hai dous anos buscan o rastros das poboacións do Paleolítico no sur lucense. Os participantes nunha ruta a pé organizada pola asociación monfortina Os Lactouros encontraron unha ferramenta prehistórica que ofrece especial interese pola zona en que foi achada, que ata agora non fora explorada polos arqueólogos.
A peza é un bifaz, un machado de pedra de múltiples usos que se considera característico do período achelense -hai entre 500.000 e 300.000 anos-, pero que se fabricou tamén noutras etapas da prehistoria. O artefacto foi encontrado nun camiño que vai desde Lobios a Viladime, nas proximidades desta última localidade, e foi probablemente desenterrado polos labores agrícolas.
O arqueólogo Arturo de Lombera, coordinador do equipo científico da Universidade de Santiago que investiga os xacementos da comarca de Lemos, sinala que o achado é suficientemente importante como para merecer que se examine en detalle a zona en que se producíu. «Máis que o estudo desa peza en si mesma, o interesante é que esa zona está situada nas cercanías do Canón do Sil, máis ao sur das áreas que estivemos explorando ata agora», explica. «Polo momento, a zona máis próxima ao Sil en que localizamos industrias paleolíticas era a parroquia de Gundivós, algo máis ao norte, e con este achado poden ampliarse aínda máis as marxes xeográficas da área investigación», engade.
De Lombera -que por agora só puido examinar o bifaz mediante fotografías- indica que a aparición dunha soa peza revelar con frecuencia a localización dun xacemento e dar pé a novas descubertas. Os investigadores, por tanto, pensan incluír a zona de Viladime no seu programa de prospeccións arqueolóxicas. Un exame detallado dos terreos, por outro lado, pode axudar a descubrir pezas de pequeno tamaño que pasan facilmente desapercibidas para os non especialistas.