A concellería de Cultura de Quiroga inicia hoxe un ciclo de actividades que pretende desenvolver ao longo do próximo ano e cuxo lema é «Aproveita os recursos do teu contorno». A primeira convocatoria consiste nunha conferencia sobre «A bioloxía dinámica e a vide» que será pronunciada por Roberto Vila García, doutor en xeografía e licenciado en xeografía e historia. A charla comezará ás sete e media da tarde na Casa de Cultura e estará aberta a todas as persoas interesadas.
O novo ciclo de actividades, segundo explican desde a concellería, terá como finalidade potenciar todos os recursos propios da comarca. As conferencias que se ofrecerán durante os próximos meses versarán sobre o aproveitamento de produtos tradicionais deste territorio, como o viño, o aceite, a castaña ou o mel, e incidirán tamén en aspectos como o fomento do turismo e a mellora da oferta gastronómica.
Nestas actividades -engaden desde o Concello- tomarán parte diversos expertos en todas estas materias que teñen un vínculo directo coa comarca quiroguesa.