O popular festexo gastronómico e etnográfico atraeu a centos de visitantes
11 dic 2016 . Actualizado a las 19:18 h.Centos de visitantes abarrotaron onte a localidade de Froxán para asistir á xa tradicional Festa da Pisa da Castaña do Courel, que chegou este ano á súa edición número dezaoito. O tempo soleado favoreceu sen dúbida a afluencia de visitantes, pero o festexo goza xa de suficiente popularidade como para a atraer xente de toda Galicia mesmo cando a meteoroloxía se presenta adversa.
Como é habitual, a principal atracción foi a recreación do método da tradicional da pisa das castañas secas e moitos visitantes animáronse a bater contra un tronco un saco cheo de froito para desprenderlle as cascas, que se sacuden despois co bandoxo, unha grande bandexa de madeira. O programa organizado pola asociación cultural Fonte do Milagro sufriu algún cambio. O pregón non foi pronunciado pola actriz Susana Dans, que non puido viaxar a Froxán por motivos familiares. Foi substituída polo poeta e contacontos Celso Fernández Sanmartín, que xa exercera de pregoeiro nunha ocasión anterior. Ao longo da xornada, por outro lado, non faltaron actuacións musicais.