Éxito de participación no concurso de fotografía Galicia, auga e literatura convocado por Viaqua
10 jun 2015 . Actualizado a las 05:00 h.O concurso foi convocado o 22 de abril e xusto un mes despois reuniuse o xurado para decidir que traballos eran os merecedores dos catro premios do certame. Difícil elección, pola cantidade e calidade das fotografías que pasaron á fase final, máis de 200. A proposta de Viaqua e La Voz de Galicia era todo un reto: os escolares tiñan que elixir un poema en galego que lles servise de inspiración para sacar unha foto relacionada co mundo da auga. Ou sexa, unha poesía, unha imaxe e unha explicación persoal sobre o traballo realizado. Nesta páxina só puidemos reproducir as catro fotos premiadas, pero na Festa de Voz Natura do pasado sábado, onde se celebrou a entrega de premios, miles de compañeiros destes fotógrafos noveis puideron admirar moitas outras que inundaron de auga e literatura a zona de Prensa-Escuela. ¡Vaia festa!
CATEGORÍA INFANTIL, PRIMEIRO PREMIO
Beñat Manteola González-Tejada, 11 anos, CEIP Curros Enríquez, Ourense.
Profesora: Lourdes Soto Carballo
Beñat inspirouse nun poema de Rosalía de Castro («Cantares gallegos»). E xustifica así a súa elección: «Regatos, regueiros, fontiñas? En Galicia (o país dos mil ríos) podemos encontrar fermosísimos recunchos nos que a auga é a protagonista. Rosalía amaba cada recanto da súa terra e reflectiuno, maxistralmente, nos seus poemas».
Misterios da tarde
murmuxos da noite:
cantarte hei Galicia,
na beira das fontes
CATEGORÍA INFANTIL SEGUNDO PREMIO
Alberto Río Gavín, 8 anos. CEIP n.º 1, Foz.
O poema no que se inspirou Alberto para facer a fotografía é de Manuel María. «Gústame moito como Manuel María conta que os ríos pequenos chegan a facer un río grande e importante, como gota a gota se vai formando un gran caudal. É moi bonita para ler».
Nós, tan humildes, somos ríos pequenos
que bicamos a terra con amor
Ríos sen gloria que lle damos ao río Miño
o noso amor sinxelo: luz e auga.
CATEGORÍA XUVENIL PRIMEIRO PREMIO
Antón López Yanguas, 16 anos, CPR Compañía de María, A Coruña.
Profesora: Xulia Morás Naya
O poema elixido é tamén de Manuel María. Atópase no libro «O Miño, canle de luz e néboa», e titúlase «Desacordo contra os contaminadores do Miño». Di Antón que Manuel María «transmite nesta obra o seu amor incondicional polo Miño, describindo detalladamente a súa natureza, aínda que tamén deixou espazo para denunciar o estado do río en poemas como o anterior. Aínda que a mensaxe do poema sexa a contaminación do río Miño, escollín precisamente uns versos onde non se nomeaba o susodito para facer referencia á miña fotografía, a cal foi sacada na ría do Burgo. Crin que podería quedar ben xuntar un poema de denuncia social cunha fotografía coma esta, posto que a ría do Burgo é unha das máis contaminadas, pola cal houbo numerosas protestas polo seu estado e pola que os políticos non moveron un dedo para mellorar o seu nefasto estado. A lata de Fanta é o elemento central ?a cal non coloquei eu para facer a foto, senón que estaba tirada na ría? e non é máis que un exemplo de falta de moralidade dos ?emporcadores da auga?, pero nada novo na ría. O obxectivo do concurso era representar a auga, a paisaxe e a literatura de Galicia. Ben, pois por desgraza, na nosa terra non todas as augas e as paisaxes son idílicas e perfectas. Hai cousas como esta que deberían cambiar axiña».
Asasinos da vida, da beleza, dos dons
marabillosos para uso e gozo do home
e de todo canto vive neste mundo.
Emporcadores da auga.
Verdugos de peixes. Violadores.
CATEGORÍA XUVENIL SEGUNDO PREMIO
Mónica Justo Fontán ten 14 anos e estuda no IES de Sanxenxo.
Dinos Mónica que escolleu un poema de Xosé María Díaz Castro e que fixo esta foto porque «ademais de que é moi bonita non é a típica foto sobre a auga que sería unha fonte ou un río, se non que simplemente é un charco de auga, o que pode simbolizar unha bágoa de Deus, e ademais aparece o reflexo dunha árbore, como é lóxico, so na zona onde hai auga, como dicindo que so hai árbores onde está ela, e que esa árbore está aí grazas a ela, o que é certo. Esta foto paréceme que expresa perfectamente a importancia da auga para a existencia da vida.
O poema di»:
Coma un río quixera eu ser: cantar
con estrelas no lombo cara ó mar,
deixando unha chorima en cada pedra
¡Unha bágoa de Deus en cada ierba!