Houbo 32 orixinais nesta edición do certame
18 sep 2015 . Actualizado a las 05:00 h.A autora viguesa Silvia Penas Estévez foi procalamada onte gañadora da décimo novena edición do premio de poesía Avelina Valladares coa obra presentada baixo o lema Diario de ladras, bailarinas, asasinas e flores - Vita la Vita.
O xurado -integrado por Neves Soutelo, David Otero, Xabier Castro e Dolores Araújo, como secretaria- destacou do poemario «a súa coidada estructura literaria, na que a secuencia do andar dos días vai trazando un esquelete harmonioso e que lle dá á obra consistencia, cualidade e boa lectura».
Silvia Penas naceu en 1980, estudou Filoloxía Galega e exerce como profesora de lingua e literatura galega. Forma parte das Redes Escarlata e ten publicado o poemario As uñas crecen (Sotelo Blanco, 2014). Co de onte suma cinco premios de poesía.
O xurado destacou o carácter de trampolín do certame Avelina Valladares, que no seu día gañaron escritores hoxe recoñecidos, como Modesto Fraga, Andrea Porto, Berta Dávila ou María Lago. Gabou tamén a calidade en xeral dos 32 orixinais presentados. «Eran todos de calidade. Non houbo desastres, como hai ás veces», destacou Xabier Castro.