As películas «Buscando a Eimish» e «12 1 una comedia metafísica» protagonizarán as citas de apertura e clausura
17 oct 2012 . Actualizado a las 20:58 h.A organización do Festival de Cine Internacional de Ourense avanzou os títulos que servirán para abrir e pechar o OUFF 2012. Para as convocatorias dos días 2 e 10 de novembro a organización do OUFF aposta «por dúas producións estatais que se estrearán en Ourense antes de pasar polas salas comerciais». As cintas elexidas son a ópera prima da directora e xornalista Ana Rodríguez Rosell, a película titulada Buscando a Eimish, e a cinta 12 1 una comedia metafísica, de Chiqui Carabante. As dúas películas son producións deste mesmo ano.
Buscando a Eimish abrirá o OUFF 2012 o día 2 de novembro, o pase será ás 21.00 horas no Auditorio de Ourense. A cinta está protagonizada por Óscar Jaenada, Manuela Vellés, Jan Cornet e Emma Suárez e conta a historia dun mozo que «colle o primeiro tren cara ao pasado da súa moza para recuperala. Na viaxe, que o levará por Italia e Alemaña, descubrirá o destino e as enerxías invisibles que crean lazos entre as persoas». A película de Ana García Rosell xa pasou por prestixiosos festivais internacionais, como os de Shanghái, Londres ou Touluse.
Para pechar o OUFF deste ano, a proxección será o 10 de novembro (21.00 horas no auditorio), contarase coa película 12 1 una comedia metafísica. A cinta está protagonizada por «uns tipos que vagan polo deserto buscando algo» e empezan a ter dúbidas «de se o que buscan a Deus ou a morte».