Biblos reúne nun só volume «Corazón entre desertos», de Tucho Calvo, e relatos de «Astra o confín»
21 ago 2009 . Actualizado a las 02:00 h.Conforme se van esgotando os días dun mes de agosto que non parece verán, a literatura galega prepara un outono de libros cheo de novidades. Un novo curso literario no que merece especial mención o feito de que a editorial que dirixe Manuel Bragado ultima xa a edición de dous novos libros de Rosa Aneiros. As obras coas que gañou, respectivamente, os premios Xerais e Fundación Caixa Galicia de Literatura Xuvenil: Sol de Inverno e Ás de bolboreta . Trátase de dúas obras moi diferentes entre si, segundo explica a súa autora, e non só por estar dirixidas a públicos de idades ben distintas: « Sol de inverno -sinala Rosa- aborda a singradura vital da súa protagonista desde a súa infancia na aldea de Antes, pasando por todos os lugares que marcan o seu percorrido vital (Barcelona, París, A Habana...), e é unha historia de longo alento, que fala da vida dunha muller e do seu desexo de regresar ao paraíso perdido. En cambio, Ás de bolboreta , ademais de estar pensada para un público moito máis novo, non de adultos, senón de lectores de 12 ou 13 ou 14 anos, é un libro que transcorre nunha soa mañá, con historias cruzadas que en moitos casos arrincan noutros lugares, pero que conflúen nun mesmo espazo e nun mesmo tempo».
«É a primeira vez que publico dous libros de maneira simultánea e para públicos tan diferentes -engade a escritora-; para min é un reto. Non só porque sexan distintos os públicos aos que van destinados, senón porque ademais son moi distintas a historias. E por tanto, moi diferentes as maneiras de contalas, tamén».
A recuperación dun clásico
Mentres, Biblos prepara a recuperación de un clásico da literatura galega, Corazón entre desertos , de Tucho Calvo, que inicialmente vira a luz baixo o selo Ir Indo. No mesmo volume se incluirán, ademais, varios dos relatos de Astra o confín ; outro dos libros do mesmo autor que, neste caso, publicara inicialmente Ediciós do Castro, e que estaba complemente esgotado. O volume reproducirá, ademais, ilustracións de Miguelanxo Prado e Xaime Quessada.