O mercado editorial está á expectativa da reacción dos consumidores
01 dic 2009 . Actualizado a las 02:09 h.Como as ondas do dixital xa chegaron ao libros e a marea dos libros de tinta electrónica golpeará con forza o mercado este vindeiro Nadal, as dúas principais editoras galegas, Edicións Xerais e Galaxia, inauguraban hai quince días a súa venda de libros electrónicos a través da plataforma Publidisa que ten como tenda a Todoebook.com.
As vantaxes que se anuncian para a lectura dixital son facilidade de adquisición, portabilidade, capacidades de interacción que polo de agora aínda están por desenvolver e, sobre todo, un menor custo por título, aínda que esixa un maior desembolso para os aparellos de lectura.
Mentres os editores galegos aseguran que hai que colocarse no mercado e logo esperar a ver como reacciona, os fabricantes e vendedores de aparellos xa teñen disposto para o Nadal un catálogo que vai dende os 300 euros dos máis económicos ata os 1.000 do máis completo. Nos últimos meses o ritmo de novidades de aparellos lectores incrementouse e posiblemente xa non se deterá se, finalmente, non aparece un aparello que sume todas as condicións de lector, consola de xogos, reprodutor de vídeo e música, axenda e teléfono cunha pantalla quizais algo superior aos estándares actuais.
Nas facilidades de adquisición é onde tampouco parece que estea moi afinado o mercado. Para quen desexe mercar calquera dos libros galegos que xa están a disposición dos lectores, o trámite é un pouco máis longo do que cabería esperar, sobre todo se atendemos a esa constante alusión ás facilidades en mercar en rede.
Antes de que un lector poida abrir as páxinas do libro que quere mercar a través desa plataforma ten que dar algúns pasos, case todos eles relacionados ben coa protección dos dereitos ou ben coa fidelización dos clientes.
O primeiro paso é a inscrición de maneira que antes de calquera adquisición o comprador deberá rexistrarse na web unha vez que ten decidido que mercar. Pode escoller os títulos que estea disposto a pagar e, cando ten a cesta disposta, pasar por caixa. Neste segundo paso hai dúas variantes: pode pagar con tarxeta ou pode utilizar pay pal, un dos métodos máis utilizados para o comercio en Rede e que no momento de mercar é máis rápido aínda que precisa previamente de que o comprador teña unha conta de pay pal habilitada.
Unha vez efectuado o pago a librería electrónica devolve ao cliente á súa páxina e remite un correo electrónico á dirección do usuario para explicarlle que a venda foi realizada e que, picando na ligazón do correo poderá iniciar a descarga do libro.
Unha vez que o usuario pagou polas súas lecturas decátase de que antes de comezar a ler hai que ter dado de alta o aparello lector na páxina que controla os dereitos, neste caso, a de Adobe. Quen o faga por vez primeira terá que descargar o programa de xestión de títulos da propia compañía e habilitar unha conta gratuíta. Este programa funcionará a maneira de xestor de bibliotecas, aínda que os aparellos lectores fornecen tamén de programas similares. Cando se completa a alta en Adobe e se instala o programa xa se pode, por fin, ler o libro mercado.