Os escritores, galardoados todos con algún Premio Nacional de Literatura, piden a dimisión do conselleiro
26 ene 2010 . Actualizado a las 02:00 h.Os once escritores galegos que foron galardoados cun Premio Nacional de Literatura piden a dimisión do conselleiro de Cultura, Roberto Varela. Así o manifestan nunha carta feita pública na que explican que «o señor conselleiro vén de facer pública, e non por primeira vez, unha análise da cultura galega temeraria e negativa. Antes xa nos ten ofrecido a súa opinión de que a ''cultura galega limita'', unha descualificación da nosa mesma identidade». Este grupo de escritores pregúntanse se deben deixar de ter cultura propia e se, no mesmo sentido, deben deixar de ser galegos para no estar «limitados», facendo referencia ás palabras do conselleiro.
Sinalan que «non pode protexer e traballar a prol da nosa cultura alguén que se expresa con ese fondo complexo de inferioridade identitario».
Os escritores, autores de obras galegas que obtiveron un Premio Nacional de Literatura na súas distintas modalidades, consideran que isto, como as outras moitas distincións e consideracións que as obras da cultura galega teñen en España e fóra, «negan a insultante e despectiva cualificación do señor conselleiro». Piden a dimisión ou cesamento inmediato de Varela, dado que «o seu coñecemento e falta de consideración cara a cultura galega veñen a evidenciar a nula idoneidade para o posto que ocupa». Os asinante sson: Alfredo Conde, Paco Martín, Antón Santamarina, Xabier P. DoCampo, Manuel Rivas, Fina Casalderrey, Manuel Lourenzo, Suso de Toro, Rubén Ruibal, Agustín Fernández Paz e Xusto Beramendi.