O Pen Club abre a súa terceira bienal reclamando a defensa dos escritores

Por uns minutos, a Bienal Literaria Internacional, que estes días se celebra en Compostela e Ourense promovida polo Centro Pen de Galicia, pareceu un congreso de linguas. A lingua centrou unha parte das intervencións de apertura, incluída a do presidente da Xunta e a do do Pen Club Internacional, John Ralston.

Mentres a Bienal se encamiñaba a explicar por que as literaturas non coñecen fronteiras, Feijoo aproveitou a cita do Pen para volver explicar que os galegos «temos sacado partido do bilingüismo convertendo esa posibilidade nunha ponte en lugar de nun pozo».

As palabras de Feijoo foron precedidas polas do presidente do Pen Internacional. Ralston, canadiano de orixe e residencia, asegurou que era necesario «defender todas as linguas e todas as culturas que se desenvolven con elas». O escritor sinalou na súa intervención que podía poñer de exemplo o caso do seu país, Canadá, para sinalar unha maneira de facer que as linguas e as culturas que corresponden convivan. Ralston tamén aproveitou para pedir que se defenda aos escritores como se debe defender a liberdade de expresión. Asegurou na súa participación que defender «aos escritores e defender a liberdade de expresión son a mesma cousa» e pediu a máxima defensa da liberdade.

Alberto Núñez Feijoo sinalou aos invitados do Pen que no Obradoiro pode aprezarse que en Galicia «ese babel de xente non é unha maldición, senón unha vantaxe», apuntando que dende hai moitos anos «Galicia converteu nunha virtude a convivencia das linguas». O presidente da Xunta aproveitou unha cita do ourensán Santiago Lamas sobre a «Galicia borrosa» para explicar que a identidade e a singularidade do país «non está afirmada sobre unha batalla, senón «sobre un camiño». O alcalde de Compostela, Sánchez Bugallo, entrou no argumento do Pen ao explicar que, a pesar de ser «o momento da historia con máis liberdade de expresión, nunca tantas ameazas houbo sobre a mesma, nin tantas dúbidas».

---

---

---