Presentado o libro de Ánxel Vázquez de la Cruz «Luz de Tebra», definido como unha obra de rescate
SANTIAGO CIUDAD
Luz de Tebra
, o libro de relatos de Ánxel Vázquez de la Cruz, editado por Xerais, foi presentado onte nun acto que tivo lugar na Aula Castelao da Facultade de Medicina e Odontoloxía da Universidade de Santiago, e no que o autor estivo acompañado por Xosé María Fraga, Manuel Sánchez Salorio, Dolores Vilavedra e o editor, Manuel Bragado. Na presentación destacouse o carácter de «obra de rescate» de Luz de Tebra , un dos libros de contos que se enxertan na herdanza de obras da literatura galega como Retrincos , de Castelao; Os biosbardos , de Eduardo Blanco Amor; Á lus do candil , de Ánxel Fole; ou Escola de menciñeiros , de Álvaro Cunqueiro. Neste sentido, considérase a obra de Ánxel Vázquez de la Cruz de toda esta estirpe, un libro que cando un o le, segundo Manuel Rivas, «sente o calorífico levedar desa luz da escuridade. E sente a inconfundíbel felicidade clandestina de quen é agasallado co bisbar da boca da mellor literatura». O escritor uruguaio Eduardo Galeano, pola súa parte, comentou sobre o libro de Vázquez de la Cruz que xa quixera el «escribir palabras así, milagreras como Santiago, y jodonas como el ángel que lo vuela: el ángel ese que acepta ser llamado doctor aunque él cura contando».