Bieito Alonso e Tino Fandiño organizan en Allariz un encontro de vellos militantes da asamblea ourensana co gallo «do XXV cabodano da desaparición da AN-PG»
02 nov 2007 . Actualizado a las 02:00 h.Hai meses leía un curioso e desconcertante artigo asinado por Bieito Alonso. O historiador e escritor ensarillaba unha colaboración feita a base de nomes propios: nomes, nomes, nomes e máis nomes. E para rematar nomes. E unha afirmación enigmática ó final: algo así como «eles xa saben a que me refiro».
Quedou así a cousa, coa incerteza no ar e ca mensaxe cifrada para iniciados. Ó pouco tempo o escritor de Coles daba as claves nunha nova entrega: os sinalados, e algúns máis, eran aqueles antigos mozos que na década dos 70 e comezos dos 80 estiveran vencellados ós movementos estudiantis, labregos e nacionalistas de Ourense. Erga, as Comisións Labregas, a AN-PG aparecían no novo artigo no que se daba conta de vivencias, episodios históricos do nacionalismo na cidade ou viaxes iniciáticos pola provincia a prol do descobremento das orixes e os problemas seculares de Galiza. E quedou así a cousa, coma un repaso das vivencias do autor e a súa xeración. Ou iso semellaba.
A nova, e definitiva entrega, aparecía no mesmo semanario e tiña formato tablón de anuncios-publicidade cunha mensaxe clara e distinta, que diría Descartes. O texto non deixaba lugar a dúbidas: «O día 1 de Decembro deste ano 2007 celébrase en Allariz un xantar de confraternidade ao que están convidadas todas aquelas persoas que militaron na Asamblea Nacional-Popular Galega (AN-PG) da provincia de Ourense entre 1974 e 1982». Rubricaban a convocatoria dous nomes de sobra coñecidos: Tino Fandiño e Bieito Alonso. O restaurador e o escritor andan a argallar o xantar «Na lembranza do XXV cabodano da desaparición da AN-PG» como se fose unha daquelas aventuras do tardofranquismo ou da transición: «Chamas a un, coméntasllo, dache o contacto ou diche donde está outro ó que lle perderas a pista, chámalo, e nesa andamos», recoñece o historiador que dende hai anos imparte ensino en Tui.
Alonso non agocha unha realidade que nada ten que ver coa épica e nace do sentimento: «A raíz dos artigos xurdiu a idea de xuntarnos. Para nós é unha cuestión emotiva, o celebrar o 25 cabodano da desaparición da AN-PG, e un pretexto para xuntar ós mozos que daquela estabamos vencellados co nacionalismo, case todos da xeración do Instituto da Ponte. Isto non é memoria histórica nin cousa que se lle semelle, é unha cuestión afectiva».
De Paco Gracía a Chus Pato
Estudantes, grupos asamblearios do rural, os das Labregas, da AN-PG eran os movementos ós que estiveron vencellados persoas que hoxendía están espallados polo mundo. Como lembra Bieito Alonso «por alí andaban xente como Paco García, hoxe alcalde de Allariz, Manuel Guede, Valcárcel, Pepe Carballude, Carlos Méixome, Xan Afonso García, Anselmo López Carreira o o seu irmán, a escritora Chus Pato ou a xornalista Carme Carballo, entre outros. Andamos a contactar con todo o mundo, o que poda virá e o que non non acudirá. Outros non poderán vir porque xa non están connosco».
A cita con mesa e mantel posto será o día 1 de decembro, no restaurante Porta da Vila de Allariz. A hora de comezo as 14.30 e os confabulados uns vellos nacionalistas curtidos nas liortas dos anos 70 e 80 na cidade e nas comarcas da provincia.