Regístrate gratis y recibe en tu correo las principales noticias del día

O Merdeiro sairá polo Casco Vello ao marxe do programa oficial de entroido

VIGO

29 ene 2008 . Actualizado a las 02:00 h.

Os membros da asociación A Revolta non queren que a figura do Merdeiro perda o seu carácter popular, e por iso rexeitan a posibilidade de que esta figura típica do entroido vigués participe no programa oficial das festas, que organiza o Concello de Vigo. «Non queremos que o Merdeiro participe nun desfile diante dunha carroza, é un personaxe que ten outro sentido e non nos gustaría que o perdese agora que tratamos de recuperalo», explica Xulio, un dos membros da asociación cultural do Casco Vello.

O Merdeiro sairá polas rúas do Casco Vello o domingo e o martes, dende as doce da mañá, e ata que o corpo aguante. «Queremos pedirlle comprensión aos vigueses, e recordarlles que estamos en entroido; a ninguén se lle ocorre enfadarse en Laza se os peliqueiros lle botan algo, é parte do entroido», sinala.

A advertencia non é en balde porque o Merdeiro é maleducado e un pouco violento. Corre, brinca e grita co ánimo de asustar a xente, e ademais vai armado dunha vara coa que intenta golpear á xente coa que tropeza.

Coa chegada da época do escarnio, os mariñeiros asumían esta identidade coa intención de ridiculizar aos labregos con quen, o parecer, tiñan diferenzas. E o mellor xeito de facelo era imitar as vestimentas dos escabicheiros, persoas do rural que recollían o escabiche e baleiraban os pozos negros da cidade para estrumar os seus campos. Os mariñeiros convertidos en Merdeiros ridiculizaban aos labregos, tanto exaxerando o seu xeito de vestir como o seu comportamento social. O parecer, os Merdeiros acostumaban vagar de xeito improvisado polas rúas da cidade, en solitario ou en pequenos grupos carecentes de organización.

Manifestación urbana

Na actualidade, o Merdeiro é a única figura do entroido urbano que queda en Galicia, e o seu valor antropolóxico é comparable a outras manifestacións moi coñecidas como os peliqueiros de Laza, as pantallas da Limia ou os cigarróns de Verín.

Dende o ano 2006, a asociación A Revolta leva traballando na investigación e recuperación desta figura que campou polo Casco Vello vigués ata a década dos anos trinta do século pasado.

Neste dous anos, a asociación conseguiu confeccionar quince traxes de merdeiro. O artista Pancho Lapeña foi o encargado de reinventar as carautas do Merdeiro xa hai dous anos.