O Liceo Casino persegue ante o Torrelavega o pase á fase de ascenso

A derradeira xornada da Liga regular do Grupo 1 da Primeira Nacional chega esta fin de semana ao seu fin. E no caso do Liceo Casino, faino co conxunto vilagarcián loitando por converterse no segundo equipo arousán en acceder á fase de ascenso á División de Honra xunto ao xa clasificado Establecimientos Otero.

Para conseguilo, o Liceo Casino deberá derrotar esta tarde no pavillón do colexio Arealonga (17 horas) o ETM Torrelavega, terceiro clasificado do Grupo 1 e, como o E. Otero, co pasaporte para a promoción xa no peto. O cadro vilagarcián non depende nembargante de si mesmo, e precisa que mañá o Oviedo, co que figura empatado na táboa a 14 puntos pero co goal average en contra, caia derrotado en Asturias co líder, o Monteporreiro.

O Liceo sabe que o Torrelavega é un rival superable, logo de perder en cancha rival por un axustado 4-3 na primeira volta e con dous xogadores tocados.

Por outro lado, co E. Otero de descanso, estes son os partidos da canteira do Cambados TM esta fin de semana: Monteporreiro-Grupo Barros, e Mercantil-J. Enrique (2ª Nac.); Liceo Casino-Chinelas (1ª Gal.); Cangas-Charol C. (2ª Gal.); e Viaxes Otero-B. Oleiros (2ª Nac. Fem.).