O Vilagarcía queda só á fronte da clasificación tras a primeira derrota do curso do Cambados

A terceira xornada de Liga da División de Honra de tenis de mesa consolidou o Vilagarcía T.M. coma líder do Grupo 1A, xa en solitario, logo da primeira derrota da tempada do Cambados T.M.

O cadro capitalino impúxose o domingo por un axustado 4-3 e 12 xogos a 11 ao Monte Porreiro Pub Patrimonio. Sergiy Nigeruk precisou de catro xogos para superar 3-1 a Leandro Nahuel Fuentes no primeiro duelo, restablecendo o empate co seu triunfo 3-1 sobre Ignacio Fernández logo da vitoria deste último ante Pedro Castro e de Martín Bentancor ante Lawal Abiodum, por 0-3. Abiodum adiantou o Vilagarcía cun 3-0 ante Nahuel, e o triunfo de Bentancor fronte a Castro, 0-3, levou o choque ao desenlace do dobres, con Nigeruk e Abiodum gañando 11-7/11-9/11-9 a Bentancor e Nahuel.

Pola súa banda, o Cambados perdeu 4-2 na súa visita ao Hotel Marqués de Santillana (Torrelavega). Lucas Bayona mantivo o cadro arousán con vida (2-2) ata os dous últimos cruces, con derrotas de Casalderrey e de Correa.