O Cambados Tenis de Mesa xógase esta tarde o ascenso co Lebrija no Pombal

Integrantes do Cambados Tenis de Mesa e persoal da Concellería de Deportes da vila do albariño afanábanse onte no Pavillón Municipal do Pombal en completar a loxística da fase de ascenso á División de Honor que entre hoxe e mañá decidirá os nomes dos nove equipos que darán o salto desde a Primera División Nacional. Un reto ó que teñen dereito os tres primeiros clasificados de cada un dos seis grupos desta última categoría, que a última hora da tarde de onte quedaron emparellados.

Hoxe pola mañá, desde as once e media, os segundos e terceiros de cada grupo enfróntanse entre si para medirse esta tarde, desde as cinco, aos campións de Liga nun partido que repartirá os seis primeiros ascensos. O Cambados T.M. tivo a mala sorte de ver como o sorteo o emparellaba co cadro da eliminatoria previa do Lebrija, subcampión andaluz, ao que lle tocara xogar pola mañá co único dos 18 equipos con dereito á fase que renunciou a participar nela. Deste xeito, os de Ñajo Padín serán os únicos campións que se enfrontarán a un rival descansado. Os perdedores das eliminatorias da tarde buscarán os últimos tres ascensos mañá pola mañá.