Vilagarcía demanda o arranxo e pintado do paseo de Carril, o balcón dende o que se ve Cortegada

O Concello de Vilagarcía dirixiuse a Portos de Galicia e a Costas do Estado para demandar o arranxo e pintado da balaustrada do paseo marítimo do Carril, cuxo estado de abandono ofrece unha pésima imaxe para a cidade, máis aínda na época estival, cando hai visitas de milleiros de turistas, tal e como o goberno local transmitiu a ambos os dous organismos nos escritos que se lles remitiron. A demanda faise ante os dous entes por repartirse a competencia no tramo do paseo que descorre entre o alto da Rosa e a zona portuaria da Alameda.

Dende Ravella advírtese que hai varias semanas que un coche derrubou un tramo da característica varanda do paseo na zona do miradoiro e segue sen repoñerse, situación que, ademais de supoñer un risco para os peóns, provoca unha imaxe de total abandono nunha zona moi visitada polas excelentes vistas que ofrece aos parques de cultivo da ameixa e á illa de Cortegada.

A maiores, a falta de mantemento por parte dos organismos competentes fai que a tradicional balaustrada de cor branco estea decolorada a causa da humidade, o que afea a zona e o balcón natural ao territorio do Parque Nacional das Illas Atlánticas, un espazo que resulta privilexiado.

Por todo, dende o Concello pídeselles a ambos os dous organismos que acometan coa maior celeridade posible as actuacións que corresponden nos seus respectivos tramos a efectos de que o paseo do Carril luza como o merecen os veciños da localidade e como se espera da zona turística e dunha contorna con tal valor natural e paisaxístico.

A reclamación que o Concello vén de elevar a Portos de Galicia e ao departamento de Costas do Estado chega tras as semanas de maior volume de visitantes do ano en Carril, as que se sucederon entre as festas patronais do Apóstolo e de San Fidel e a exaltación do produto estrela do lugar, a ameixa. Experiencias que os milleiros de turistas que pasaron estes días por Carril gardarán no recordo acompañadas da nada edificante imaxe do mal estado do seu paseo marítimo.