O Salnés pechou o plan de emprego acadando un 85 % de contratacións entre o alumnado

A Mancomunidade do Salnés rematou a duodécima edición do Programa Integrado de Emprego (PIE) cun balance «moi positivo», segundo a valoración que fan desde a entidade. Ao longo de doce meses desenvolveuse un itinerario formativo sobre elaboración de viños, soldadura, caixeiro-repoñedor, xestión integral de almacén, inglés, xestión contable, agricultura ecolóxica biointensiva, manexo de carretas frontal e retráctil, manexo de minipala retroescavadora, manipulación de alimentos, prevención de riscos laborais e informática básica e avanzada.

Pero o principal motor desta última convocatoria foron as novas tecnoloxías mediante cursos sobre manexo de drons autónomos, aéreos, anfibios e subacuáticos, a dixitalización documental e fotogrametría, a robótica colaborativa a creación de blogues, e commerce e Community manager, o márketing dixital, social media, machine learning e big data, a impresión 3D multicolor, realidade virtual e Internet das Cousas.

A realización de prácticas en empresas de enerxías renovables, siderometalurxia, supermercados, loxística e almacén, eólicas, sector do mar, asesorías e adegas, entre outras, permitiron aos usuarios do PIE poñer a proba as súas potencialidades e, posteriormente, pasar a formar parte dos seus persoal desempeñando postos de nova creación nos ámbitos de aeroxeradores mediante drons con cámara térmica ou vixilancia nocturna de parques de bateas para paliar o furtivismo.

No PIE (Emprega Salnés) participaron un centenar de persoas, a media de cursos realizados por cada unha de elas foi de once e o nivel de inserción laboral acada o 85 % en contratos de máis de tres meses, segundo os datos que facilita a mancomunidade. En total, xestionáronse 1.400 ofertas de traballo a través de 760 empresas que forman parte da base de datos creada pola mancomunidade ao longo dos anos. Nestes momentos, a entidade que agrupa aos concellos de Vilagarcía, Cambados, O Grove, Sanxenxo, Vilanova, A Illa, Meis, Ribadumia e Meaño, está xa co proceso de selección de candidatos e están en marcha as primeira accións formativas de próxima edición do 2025.