O Asmubal Meaño xoga co único equipo que logrou vencer o líder

O Inelsa Solar Asmubal Meaño cambia hoxe o seu habitual horario das 20 horas polas 17.30 para recibir o Alegra BM Sanse. Fronte a fronte, o segundo mellor equipo do Grupo A da División de Honor Plata Femenina, con 17 puntos, e un conxunto madrileño que pese a ocupar o sétimo posto provisional, con 12 puntos, se presenta no Pavillón Coirón Dena como un dos colectivos máis a ter en conta.

O Sanse é, a día de hoxe e a falta de tan só dúas xornadas para a conclusión da primeira volta do campionato regular, a presente e a da semana que vén, o único equipo que lle fixo perder puntos ao líder, o Balonmano Gijón. Hai un mes, en cancha madrileña, con 20-17 no marcador final co que o hoxe rival do Asmubal iniciou una xeira de dúas vitorias —derrotou 28-30 a SAR en Redondela— e un empate, a semana pasada na súa cancha no derbi co Balonmano Leganés (27-27).

O conxunto meañés, pola súa banda, chega á cita sabendo que debe gañar para non descolgarse dun Balonmano Gijón que onte lle endosou un 22-37 ao feble Fuentes Carrionas. Claro que, tras os pésimos finais de partido ante a Cañiza, con empate in extremis, e o Gijón, con derrota en Coirón, o Asmubal semellou tomar boa nota, superando 33-38 a SAR a semana pasada.