As pasarelas do paseo das Torres do Oeste contarán cunha malla para evitar esvaróns

Comezaron as obras para evitar esvaróns nas pasarelas do paseo das Torres do Oeste en Catoira, nas que se instalará unha malla co fin de garantir a seguridade peonil e reducir as caídas e tropezos habituais debidas á chuvia e á humidade.

As obras corren a cargo da empresa Construcciones Lemos Martínez SL e os fondos para a actuación chegan dunha subvención da liña de concorrencia non competitiva do Fondo de Compensación Ambiental autonómico para o ano 2024.

Coa instalación da rede (malla de seguridade hexagonal grampada á madeira) xerarase unha superficie estriada que evitará que se escorregue pola presenza de auga e de follaxe e carriza. Ademais de aumentar a seguridade e o confort das persoas usuarias da infraestrutura, «a rede actuará tamén como un mallazo, logrando ampliar a vida útil das pasarelas», segundo informan desde o goberno local.