267 persoas de Arousa beneficiaranse do programa de termalismo da Deputación

Un total de 267 persoas maiores de 55 anos de doce concellos de Arousa poderán desfrutar de estancias en balnearios, talasos ou spas da provincia dentro do programa +Benestar da Deputación de Pontevedra. O obxectivo desta iniciativa é facilitar o acceso a actividades de ocio saudable e envellecemento activo en establecementos hostaleiros e , ao mesmo tempo, dinamizar o sector turístico durante os períodos de menor actividade.

Destas 267 persoas 49 son da Illa, 33 de Cambados, 12 de Catoira, 56 de Meaño, 7 de Meis, 7 do Grove, 2 de Pontecesures, 6 de Ribadumia, 27 de Sanxenxo, 9 de Valga, 47 de Vilagarcía e 12 de Vilanova.

O programa, que arranca este domingo 3 de novembro coas primeiras saídas, ofrece estancias de seis días e cinco noites nun establecemento termal para as preto de 2.200 persoas empadroadas na provincia.

O programa de termalismo da Deputación desenvólvese en sete establecementos termais da provincia, situados en Sanxenxo, Mondariz, O Grove e Lalín (Gran Talaso Hotel Sanxenxo, Balneario de Mondariz, Hotel Carlos I Silgar, Talaso Hotel Louxo La Toja, Hotel Spa Norat Torre do Deza, Hotel Spa Galatea e Hotel Nuevo Astur Spa). Ademais da estadía, o paquete comprende pensión completa (coas bebidas incluídas); o uso do spa, do balneario ou doutras instalacións de características similares un mínimo de dúas horas ao día; e o traslado de ida e volta en autobús aos establecementos desde os concellos de Vigo ou Pontevedra.