Che Tembra, Rodrigo Romaní e Barahúnda, galardoados cos premios Barbantia

O vindeiro sábado, a partir das 12.30 horas, a comarca vivirá a súa gran festa cultural da man da Asociación Barbantia. A entidade celebrará un ano máis a entrega dos Premios Barbantia da Cultura, representados nun sereo que este ano recaerá nas mans de tres insignes representantes do eido artístico e cultural da bisbarra. Os votos dos socios do colectivo decidiron que nesta ocasión os galardóns foran para Rodrigo Romaní, Barahúnda e Che Tembra.

Dáse a circunstancia de que os tres conseguiron o premio na súa primeira candidatura aos sereos. Che Tembra, o artista do ferro que converte en esculturas restos de refugallos, recibirá o galardón á Traxectoria Cultural no Barbanza. Nas votacións, o seu nome impúxose aos dos outros dous finalistas, a soprano Esperanza Mara e o pintor Antonio Pérez.

Pola súa banda, o Premio á Iniciativa Cultural no Barbanza recaeu en Barahúnda. O dúo musical, de orixe madrileña pero afincado en Rianxo hai tempo, conquistou aos socios de Barbantia coa melodiosa voz de Helena de Alfonso e foron elixidos fronte ás candidaturas de Os Menestreis e o Museo Valle-Inclán.

Tamén se fixo acredor do sereo na súa primeira participación como finalista o noiés Rodrigo Romaní, que recollerá o Premio da Cultura Galega, un galardón que recoñece a súa traxectoria como músico de prestixio a nivel internacional. No seu caso, o fundador de Milladoiro competía na mesma categoría con Manuel Olveira, director do Museo de Arte Contemporánea de Castela e León, e coa cantante Sonia Lebedynski.

Os nomes dos vencedores foron elixidos mediante unha votación realizada entre os socios da entidade cultural, que este ano contou coa maior participación da historia dende a creación destes galardóns.

Medio cento

Dende que se instauraron os Premios Barbantia da Cultura, aló polo 2007, son máis de medio cento os artistas de todas as disciplinas que recolleron o seu sereo. Os tres novos gañadores dos galardóns recibirán o seu o vindeiro sábado nunha gala que se celebrará na casa de cultura de Muros e que servirá tamén como escenario para a presentación do recompilatorio e do anuario que a entidade edita a finais de cada exercicio con colaboracións de escritores e colectivos vencellados á cultura da bisbarra.

Ademais do Anuario de Estudos do Barbanza 2024, este ano tamén se presentará o sétimo recompilatorio de A Voz de Barbantia, que reúne nun só volume os números que viron a luz no suplemento das páxinas de La Voz de Galicia entre o 31 de xaneiro do 2020 e o 28 de maio do 2022.

Aquelas persoas que non poidan asistir ao acto poderán seguir o desenvolvemento da gala en streaming, e como colofón a esta festa da cultura celebrase una comida de Nadal en Muros. Para asistir ao xantar é preciso anotarse antes do mércores 11 no enderezo de correo electrónico barbantia@barbantia.es.