Man e Pondal, xuntos nun taller celebrado en Ponteceso

Dous dos grandes nomes que representan á bisbarra, Man de Camelle e Eduardo Pondal, xuntáronse onte no Couto dunha maneira polo menos literaria. Foi, en realidade, grazas a un obradoiro de literatura e ilustración sobre o anacoreta falecido hai dez anos e medio, celebrado na Fundación que leva o nome do autor de Os Pinos, e que naceu a poucos metros da sé da entidade na que se levou a cabo.

Este taller foi impartido por Beatriz Maceda Abeleira e Laura Veleiro Suárez, autora e ilustradora do libro Man, o Alemán de Camelle, editado por Edicións Galebook. Os destinatarios foron os alumnos da Escola de Verán que se leva a cabo.

As autoras interviron en dous momentos. Primeiro, para realizar unha contada sobre a narración, e segundo, para desenvolver un obradoiro de ilustración. Puideron facelo dentro da sección que os organizadores da actividade lúdico-deportiva denominan Convidade da Escola de Verán, e que contará en breve con outros nomes destacados. Seguramente a que máis dará que falar será a gaiteira e pianista ourensá Cristina Pato.

En canto ao libro analizado onte, Man, o Alemán de Camelle é unha narración para público infantil dun heroe respectuoso coa natureza e co seu entorno. «Un artista que non precisaba máis que as mans e os materiais atopados entre as rochas para crear un museo único ao aire libre», como o definen.