«Tratamos de atopar esas grandísimas ideas que tamén existen ao noso redor»

Bill Gates, Al Gore, Jane Goodall, Isabel Allende ou Richard Branson son algúns dos persoeiros que teñen pasado polo foro TED, creado en California hai xa 30 anos, e que desde o 2010 dispón dunha experiencia similar nesta comunidade baixo a denominación TEDxGalicia. Carballo será escenario mañá (Pazo da Cultura, 16 horas) da sesión anual deste encontro promovido por Juan Marcos Pérez Gulín, director tamén da Fundación Galicia Sustentable.

-¿En que consiste este foro?

-Basicamente, o definiriamos como unha experiencia, pero en realidade é complexo de transmitir e o que nos gusta é que a xente que vén cada ano ten moitas gañas de contarllo aos seus amigos e compañeiros, pero tampouco é quen de explicalo. É unha experiencia que hai que vivir arredor das ideas, das iniciativas e do coñecemento que temos ao noso carón.

-¿Cal é a súa orixe?

-Xurdiu como xorden moitas das cousas que logo vemos nos filmes americanas. Xuntáronse un día un grupo de xente e comezaron a falar, a compartir ideas e a crear un espazo diferente onde non fose todo a educación formal ou falar «do meu libro», senón compartir ideas ou reflexións que como di ese pequeno slogan merecen a pena ser compartidas. Iso comezou a medrar e despois no 2009 sacou un programa para a deslocalización do evento, porque se seguía a facer exclusivamente nos Estados Unidos, e desde o 2010 temos unha licenza da fundación TED para facelo aquí en Galicia.

-¿Quen vai participar na xuntanza de Carballo?

-Sempre buscamos os perfís máis diversos. O formato impulsárano persoeiros moi coñecidos que foron os que lle deron ese atractivo inicial, pero agora estamos no seguinte paso no que o que tratamos de facer é atopar esas grandísimas ideas que tamén existen ao noso redor. Entón, os poñentes do noso evento son da contorna máis próxima e temos desde artistas, empresarios, emprendedores, granxeiras... Hai un pouco de todo.

-E tamén xente da comarca, como a pintora Milagros Cotelo, ou o actor Vicente de Souza, que será o presentador do acto.

-Así é. Milagros ten un feito significativo evidente que son as dificultades a maiores que topa ela para facer algo tan espectacular como é a súa obra, e vai compartir con nós cousas moi cotiás, pero que se cadra non temos tempo no día para reflexionar sobre elas.

-E a acollida parece que foi boa porque as prazas están esgotadas.

-Si. Enchemos o aforo do Pazo, pero todas as charlas serán gravadas e na semana seguinte todo o mundo poderá velas a través de Internet gratuitamente e sacar partido desas ideas, porque queremos que isto máis que un evento, sexa un movemento.