Un camiño cara as Letras Galegas

«Consigamos ou non un Día das Letras Galegas para Labarta Pose, o importante é descubrir unha figura importante da cultura galega», afirmou o alcalde de Zas, Manuel Muíño, no «impresionante» acto de presentación do Roteiro Literario Enrique Labarta Pose na Costa da Morte, elaborado por Tania Carreira e impulsado polo Consello da Cultura Galega e o Concello. No centro sociocultural de Baio estaban representadas as entidades do municipio para darlle o seu apoio a esta iniciativa.

Tania Carreira, que explicou o itinerario, foi mantedora do encontro. O escritor e xornalista Manuel Gago, situou a importancia do percorrido, incluído agora entre os outros 21 do Consello da Cultura Galega. Con estes vieiros, esta institución persegue «facer comprensible a obra dos escritores» por medio do territorio que lles serviu de base. Son lugares que están fóra dos circuítos turísticos habituais. Trátase de abrir novos camiños. Loou o traballo do Concello de Zas e de Tania Carreira, quen contou que a ruta ten 250 quilómetros, para facer en dúas xornadas.

A partires dese intre, as intervencións tiveron centráronse na reivindicación dun Día das Letras Galegas para Labarta Pose. O físico Jorge Mira, presidente da comisión que traballa pola homenaxe da Real Academia Galega para o escritor baiés, contou a historia desta loita, dende 1998. Fixo patente a necesidade de recuperar o valor do xornalista, poeta e «primeiro narrador da Costa da Morte». Unha figura popular que xa hai máis dun século facía referencia nas súas obras á defensa dos animais e reivindicaba a igualdade para as mulleres.

Os agradecementos foron múltiples e reiterados na hora que durou o acto, incluídos os da presenza da alcaldesa de Vimianzo.

Ricardo García Mira, presidente da entidade Xoán Vicente Viqueira, lembrou o acordo do Congreso de Deputados de apoio á obra de Enrique Labarta e Eduardo Pondal e afirmou que reavivar a figura do autor de Baio é «recuperar unha referencia cultural dentro do territorio».

A Rosario Álvarez, presidenta do Consello da Cultura Galega, xogou de nena en Pontevedra nunha rúa coa placa do poeta soneirán. Quedou impresionada polo acto de onte e anunciou que «levará o recado» á Real Academia para que o escritor teña un Día das Letras Galegas.

Itinerario, parada a parada

• Centro sociocultural de Baio
• Casa natal de Labarta Pose
• Praza de Enrique Labarta Pose
• Igrexa de Santa María de Baio
• Monte Castelo
• Igrexa de Bamiro
• Batáns e muíños do Mosquetín
• Capela do Carme do Briño
• Camelle
• Faro de Cabo Vilán
• A Ponte do Porto
• Cereixo
• Santuario da Barca de Muxía
• Corcubión
• Igrexa de Baíñas
• Brandomil
• Pazo das Edreiras
• Zas
• Pico de Meda
• San Cremenzo de Pazos
• Igrexa de Traba
• San Lourenzo de Berdillo