A Costa da Morte fíxose un oco na 26.ª edición dos Premios María Casares

Os 26.º Premios de Teatro María Casares, organizados pola Asociación de Actores e Actrices de Galicia (AECC), xa teñen gañadores. Da gala celebrada o xoves no Teatro Rosalía de Castro da Coruña saíron recoñecementos con fonda pegada da Costa da Morte. A obra Cigarreiras, de Contraproducións e Teatro Romea, levou tres galardóns: por espectáculo, por dirección (Cándido Pazó) e por escenografía (Dani Trillo).

Congratulouse moito o Festival Internacional Outono de Teatro de Carballo (FIOT) pola compañía, que precisamente fixo no Pazo unha residencia e preestrea desta obra: «Teño que facer mención ao FIOT que nos acompañou nesta aventura», dixo Pazó ao recoller o premio. Foi, ademais, a máis votada polo público na última edición do festival. Tamén hai nomes da comarca, como Marta Lado ou Artur Trillo, na autoría do premiado como mellor texto orixinal, A parábola do angazo, de Talía Teatro.

Tamén esta función se estrou no FIOT 2021, polo cal pasou ademais Othello, de Voadora, que se fixo o xoves con dous galardóns.