Historia, arquitectura e sociedade: a cita deste sábado no Casino de Carballo

Unha conferencia do historiador Xan Fraga no Casino de Carballo, en imaxe de arquivo

O Casino de Carballo iniciará esta tarde cun recital poético unha intensa fin de semana de actividades. Entre elas, para este sábado 5 de abril ás 12.00 do mediodía, cabe destacar un encontro que leva por título O Casino de Carballo: historia, arquitectura e sociedade. Con conferenciantes de primeiro nivel, será un dos actos máis destacados do centenario, e permitirá abordar o contexto histórico, urbanístico e arquitectónico das sociedades culturais e recreativas tales como Casinos, Liceos, Ateneos, Cafés, Círculos... É nese ámbito no que se poñerá en valor a importancia do Casino de Carballo, tratando tamén a representatividade e os valores deste centenario edificio no urbanismo e arquitectura da época. Obviamente, tamén haberá tempo para falar da situación actual e do futuro destas sociedades. 

O encontro está pensando para desenvolverse na modalidade de charlas-coloquio duns vinte minutos de duración, cun coloquio-debate final para que o público faga as preguntas ou apreciacións que consdiere. Désirée Domínguez Pallas (Carballo, 1978), licenciada en Historia da Arte e directora do Arquivo Histórico da USC, serán quen modere o encontro, no que intervirán: 

• Patricia Cupeiro López, profesora axudante e doutora da Historia da Arte. A súa sesión será O casino de Carballo: unha arquitectura para o lecer, un patrimonio centenario. Analizará contexto histórico e artístico do edificio. 
• Fernando Franjo Franjo (Monforte de Lemos, 1963). Licenciado en Xeografía e Historia. O papel dos Casinos en Galicia: o exemplo de Santiago será a súa intervención, na que abordará os centros recreativos no contexto histórico e social da Galicia de mediados do XIX e a súa evolución no século XX.
• Xan Fraga Rodríguez (Carballo, 1958). Profesor, historiador, escritor. No seu tempo, baixo o título de Asociacionismo carballés: do Bergantiños FC ao Casino, falará de asociacionismo, urbanismo e arquitectura, centrándose no caso de Carballo e en dúas institucións centenarias da vila: o Bergantiños FC e a Sociedade Cultural e Recreativa Bergantiños.