Case unha ducia de candidatos para o certame de coplas de Monte Branco

Un total de once persoas concorren este 2022 ao concurso de coplas de entroido convocado por la asociación cultural Monte Branco de Ponteceso, unha edición na que se rende tributo á pandereteira Matilde de Limiñoa, falecida no 2016. O resultado do certame, que ten como fin a posta en valor de crenzas e costumes deste tempo, ademais de fomentar a creatividade literaria, coñecerase este vindeiro domingo, ás 12.30 horas, que será cando se entreguen os premios na Casa dos Veciños do Couto. Integran o xurado Mar Suárez, Pepe Alborés e Diana Varela Puñal. Esa mañá de 6 de marzo, ademais, lerase unha semblanza e un grupo de cantareiras interpretarán, en memoria da homenaxeada, Maneo e Muñeira de Seavia. Para os asistentes haberá petiscos e música.

Aulas Científicas

Comunica a Fundación Pondal, doutro lado, que as estancias da súa sede, no Couto, volverán encherse de pequenos e mozos na procura de coñecementos. Este vindeiro sábado, día 5, retomaranse as Aulas Científico-Tecnolóxicas Isidro Parga Pondal. Sumaranse, de feito, dúas novas propostas, un obradoiro audiovisual e outro de radio. Ambas actividades levaranse a cabo dun xeito ameno e divertido, aprendendo contidos de interese con moitas aplicacións, cuestións das que sacar proveito no día a día. As inscricións faranse o mesmo sábado, ás 09.45 horas.