Gabriel Varela gañou o certame de coplas de O Couto, dedicado este ano á Caravela

Logo de impoñerse a outros oito participantes, Gabriel Varela Pose foi o gañador do concurso de coplas de entroido que promoveu a Asociación Monte Branco de O Couto, Ponteceso. Así o decidiu un xurado que estivo integrado por Rocío Romar e Luz Cures, ámbalas dúas docentes de galego no instituto Urbano Lugrís de Malpica, que onte comunicaron a súa decisión nunha festiva xornada na Casa dos Veciños. Tamén entregaron accésits a Francisco Luís Abella Cruz, Breogán Lourido Corral e Jorge Luis Alfeirán Chouciño, e nesta ocasión a ata onte vixente campioa do certame, Lupe Blanco, non foi recoñecida entre os textos vencedores. Cada ano o certame rende homenaxe a unha personalidade destacada da vida cultural pontecesá, e nesta ocasión a elixida foi Encarnación Toja Figueiras, A Caravela, figura que ao longo da mañá de onte estivo moi presente.

Ademais de dar a coñecer a decisión do xurado, onte tamén houbo unha degustación de callos e unha foliada a cargo de Os Farrapos de Cesullas, a agrupación Inllar e os pandeireteiros da Casa da Muller de O Couto. Todo ilo, coa presentación do comunicador e empresario Pepe Formoso, que conduciu un acto que serviu para revalorizar, cultivar, difundir e promover costumes e crenzas de sempre. Así, a entidade recuperou hai uns anos un certame que xa se fixera nos 90 co obxectivo de fomentar a creatividade literaria e manter vivas as coplas e regueifas tan propias da comarca de Bergantiños.

Os participantes tiñan que presentar traballos cun mínimo de seis estrofas, e canto menos unha delas debía estar dedicada á figura homenaxeada, A Caravela.