Como tarefa para o ano en curso, Henrique Tello confía en que Alvedro poida manter o seu tirón e incrementar o volume de pasaxeiros. «O noso reto é conseguir un enlace nacional máis e unha ruta ao estranxeiro, preferentemente a Amsterdam, aínda que en primeira instancia nos pediron 1,5 millóns de euros por voar dous días», afirma.
-¿Que pasou con Easyjet?
-Fixemos unha oferta sen condicións e nin sequera responderon. Non quixeron negociar nada. Sentinme enganado, porque nos dixeron que se repuntaba o tráfico en Semana Santa quedarían, e aínda que nós cumprimos, eles non. Pese a todo, teñen as portas abertas para volver cando queiran. Todas as compañías aéreas teñen as portas abertas.
-¿Como van os contactos con Turismo de Barcelona para entrar en Spanair?
-Non coñezo esa proposta, pero acabamos de renovar o convenio con Spanair para dous ou tres anos máis e imos ver se poden ampliar destinos.
-¿E Tap Portugal?
-Estamos en conversas para ampliar o convenio, porque nos piden máis que o IPC de suba e non estamos moi de acordo, pero a sintonía é boa e vaise renovar.
-¿Clickair?
-Teñen contrato ata o 2010 e, aínda que nestes casos non se pode apostar, parece que non haberá sobresaltos no 2009.
-¿Hai algo en marcha con Air Nostrum?
-Moitas conversas abertas. Gustaríanos que operaran máis desde A Coruña, pero é unha liña cara, que busca un pasaxeiro de negocios.
-¿Volverá algunha «low cost» a Alvedro?
-Polas características do aeroporto, é difícil, aínda que non descartable.
-¿E a aeroliña coruñesa?
-Nun momento dado foi unha posibilidade real que estou seguro de que se retomará no futuro, pero o incremento do prezo do petróleo impediuna.