O Arousa encamiña na primeira parte a súa goleada en Arteixo

O Arousa abriu este sábado a oitava xornada de Liga da Tercera RFEF selando a súa cuarta vitoria da temporada e, con ela, sumando 13 dos 15 últimos puntos en xogo. Fíxoo regalándose ademais a súa maior goleada na era Míchel Alonso, 3-5 fronte ao modesto Atlético Arteixo, que o sitúan provisionalmente e por primeira vez na zona de promoción de ascenso, quinto na táboa en espera do groso da xornada no día de hoxe.

O conxunto arlequinado sustentou o seu éxito sobre o sintético de Ponte dos Brozos na súa capacidade para castigar con gol cada erro, forzado ou non, do seu rival. Con dous na presión da saída do balón do Arteixo que deron pé ao 0-1, obra de Martín Diz no minuto 26, e a un tanto en propia meta de Achore no 38. Un mal despexe do porteiro Néstor, deixándolle o balón morto a José Rivera para subir o 0-3 a pracer ao bordo do descanso, semellaban finiquitar a un equipo anfitrión que, pese ao que puidera parecer, saíra ben plantado ao campo.

Pero a película do partido mudou á volta de vestiarios. O Atlético Arteixo saíu a morder, e á terceira boa ocasión foi a vencida, con Rojo anotando o 1-3 de penalti por derribo.

Ao pouco de saltar ao campo, Álex Compa volveu ensanchar a diferenza do Arousa no 71. Rojo devolveu unha pequena esperanza aos locais asinando o 2-4 no 84, pero Javi Pereira, nunha fermosa acción persoal só dous minutos despois driblando dúas veces o central que o encimaba, anotaba cun disparo desde unha esquina da área grande colando o esférico por unha das escadras da portería defendida por Néstor.

Un centro de Achore case nada máis volver sacar de centro converteuse en asistencia par Otero. Co 3-5 Tomé inda rematou por riba da trabe nun saque de esquina xa no tempo de prolongación nunha segunda metade no que Arousa encaixou tres tantos pero non viu perigar o seu triunfo.

FICHA DO PARTIDO:

ATLÉTICO ARTEIXO (3): Néstor, Achore, Iván Dopico (Tomé, min 75), Agulló, Moure (Naya, min 58), Diego Vela (Iván Vázquez, min 58), Rojo, Adri Otero, Pablo Ramos (José Ramón, min 54), Pereira (Giraldi, min 75) e Fer Gordo.

AROUSA (5): Álex Vila, Luis Castro, Pacheco (Javi Pereira, min 73), Concheiro (Óscar Varela, min 65), José Rivera (Álex Compa, min 65), Iñaki Martínez (Noel, min 73), Martín Diz, Samu Santos, Javi Villar, Carlos Torrado e Romay (Dani, min 73). 

GOLES: 0-1, min 26: Martín Diz. 0-2, min 38: Achore (en propia puerta). 0-3, min 43: José Rivera. 1-3, min 58: Rojo (de penalti). 1-4, min 71: Álex Compa. 2-4, min 84: Rojo. 2-5, min 86: Javi Pereira. 3-5, min 87: Otero.

ÁRBITRO: Óscar Martínez. Amonestou os xogadores locais Moure e Dopico e os visitantes Carlos Torrado, José Rivera e Mario.