Víctor Freixanes, premiado co Rosa dos Ventos polos alumnos dun instituto de Bos Aires

Os alumnos de quinto curso de bacharelato do instituto Santiago Apóstol de Bos Aires puxeron en marcha este ano un premio de carácter anual que homenaxea a quen se distinga para achegar a cultura galega nas dúas beiras do Atlántico. Este ano os alumnos de máis idade do centro educativo da capital arxentina escolleron a Víctor Freixanes como primeiro merecedor deste galardón.

As razóns do premio, que será entregado hoxe nas instalacións do Centro Galicia, foron xustificadas polos estudantes co argumento de que Freixanes é «un guieiro que acubilla o respecto polo labor desenvolvido nesta beira do Atlántico a prol da cultura galega». Lembraron as veces que o escritor participou en actividades da comunidade escolar «apoiando os traballos do centro educativo» e introducindo na súa realidade «a importantes figuras académicas e políticas da cultura» galega.

Galaxia na feira do libro

Ademais de recoller o premio outorgado polos alumnos do Santiago Apóstol, un instituto que se denomina galego-arxentino, Víctor Freixanes participa como director de Galaxia na Feria del Libro de Bos Aires, que comezou o pasado luns.

Por primeira vez, unha editorial galega representa ao sector español nas mesas de debate. Neste caso, Freixanes participará nunha mesa redonda baixo o título La experiencia de los protagonistas, dedicada ás novas tendencias da industria editorial. Xunto ao escritor e editor galego participan nesa mesma mesa redonda Karina Grasccarolli, da editorial arxentina Comunicarte; Pablo Braun, da tamén arxentina Eterna Cadencia, e Cristina Mosca, da editorial uruguaia Booksahop, moderados polo profesor José del Río.

Galaxia está traballando nunha plataforma dixital para a edición e a cultura galega en colaboración coa Universidade da Coruña, e que ten previsto distribuír de xeito universal todo tipo de produtos culturais galegos.