Manuel Rivas: «Teño que repensar se quero continuar na Academia nesta situación»

Para Manuel Rivas a situación da Real Academia Galega trala dimisión de Ferrín «é catastrófica». O escritor asegura que no «contexto actual teño que repensar se quero seguir na Academia nesta situación».

«A circunstancia actual da institución non é a mesma que cando eu entrei e este cambio obrígame a repensar se debo ou non permanecer como académico», apunta Rivas.

O escritor considera, «aínda que sexa algo inxenuo», que debe quedar algunha esperanza para resolver a situación porque, declara, «eu pediría que Ferrín agotase o seu actual mandato». Rivas asegura sentirse incómodo «con algunhas acusacións vertidas desde o anonimato por académicos» e pide que se abandonde o «cainismo que tantos estragos causa no país para adoptar isto que antes se chamaba altura de miras».

O escritor tamén considera que hai unha «considerable desproporción entre as cuestións que son motivo de polémica e as repercusións das mesmas». Rivas lembra que non sucedeu «nada ilegal» e que pode ser «necesario que a Academia poña en marcha un regulamento para establecer contratacións públicas». Igual que outros consultados, o escritor sinala que a valoración do presidente e da súa xestión «é globalmente boa e esta circunstancia aínda fai máis difícil entender por que a situación acaba en dimisión». Na opinción de Rivas «a situación debería reconducirse desde unha confianza básica, desde unha certa unidade que pense no país e que abandone comportamentos cainitas que non benefician á cultura galega nun momento moi grave para a mesma».

Desde a perspectiva do novelista e poeta é necesario recompoñer a situación e considera necesario que todo o mundo recapitule e que Ferrín «poida acabar o seu mandato polo ben da institución e do país». Rivas entende que esta sería unha circunstancia positiva, pero advirte que noutro caso «a situación da Academia será tan diferente que teño que pensar se quero seguir ou non nela».