Begoña Caamaño recibe o premio das editoriais galegas ao mellor libro de ficción

As editoriais galegas entregaron onte en Vigo, no transcurso da VIII Noite da Edición de Galicia, os premios aos mellores libros do ano pasado. O premio Ánxel Casal ao libro de ficción recaeu en Morgana en Esmelle (Galaxia), de Begoña Caamaño. O Ánxel Casal ao libro de non ficción foi entregado a Agustín Fernández Paz polo seu traballo O rastro que deixamos (Xerais). En canto ao Ánxel Casal ao libro de poesía ou teatro levouno Manuel Torneiro, con Os ángulos da brasa, (Kalandraka).

Na gala entregáronse tamén o Premio Isaac Díaz Pardo ao mellor libro ilustrado foi para Antonio Seixas, por Cartas de inverno (Xerais). O corazón de Xúpiter, de Ledicia Costas, levou o Premio Neira Vilas ao mellor libro infantil e xuvenil.

O Premio Lois Tobío ao libro traducido foille entregado ao libro Alén das fronteiras, (Kalandraka) de Isaac Xuvin; o Premio Xosefa Vilarelle ao libro educativo foi para Peixes. Cociña infantil (Ouvirmos); o Premio Álvarez Blázquez, que recoñece unha traxectoria, foille entregado a Fina Casalderrey; o Rosalía de Castro á mellor iniciativa editorial foi para OQO films; e o Fernández del Riego á difusión cultural foi para a Fundación Penzol.