Viggo Mortensen recita en galego na Coruña da man de Yolanda Castaño

«Fartas da chuvia de novembro. Refuxiados acubillo dos versos. Fervorosos da poesía que, por suposto non perdedes unha sesión desta programación poética que levamos ofrecendo 15 anos...». Así comezou a poeta e xestora cultural Yolanda Castaño, recentemente recoñecida co Premio Nacional de Poesía 2023. A de onte era unha xornada especial no ciclo Poetas Di(n)versos, e Castaño, coordinadora da iniciativa, sabíao. A ringleira de xente que percorría desde a porta do auditorio ata a entrada do Ágora da Coruña xa adiantaba que os convidados eran de excepción: o actor estadounidense de ascendencia danesa Viggo Mortensen (1958) e o mariñeiro de Cee Xosé Iglesias (1974).

Antes de que os artistas pronunciasen as primeiras verbas, Castaño xa advertía que non se ía falar da faceta cinematográfica de Mortensen aos despistados «que facían cola por se vían cousas que non van acontecer». Engadiu que os asistentes atopábanse no único ciclo regular en España con presenza de autores internacionais e galegos. «Xente dos cinco continentes, de Singapur ata Cuba. Premios Pulitzer americanos, precandidatos ao Premio Nobel, Premios Reina Sofía...», resaltou a poeta.

Do mar á morte

Un auditorio en penumbra acompañou en silencio a ambos autores. Versos sobre a morte, a inmensidade e a soidade dos océanos, sobre a maternidade, as guerras e ata a situación política en Arxentina... Mortensen e Iglesias intercalaban temas tan emocionais como racionais. «El próximo poema lo estaba mirando hoy a la hora del almuerzo. Tenía la tele puesta y venían las noticias de Sudamérica y me di cuenta de que este poema algo tiene que ver con el nuevo presidente de Argentina. Entonces se lo dedico a Javier Milei, al niño que fue y al hombre que ha llegado a ser: “Sabe que las reglas de conducta cambian poco, pero los mitos son mocos que no cesan de renacer y algunos vienen con pelitos. A veces las cosas se dejan hacer, las palabras necesarias aparecen, pero hoy, el pibe cae en el remordimiento de cálidos recuerdos. Rechaza ramas verdes, que no son ideas suyas. Confirma sospechas, muerde sus manos, pies, lengua. Le cuesta imaginar que es astuto, y puede sobrevivir en un mundo lleno de artistas. Ve, calla, mira, no mira. El niño lobo guarda plumas que encuentra, cree que son de las alas de soñadores. Desea ser como ellos, trata de absorberlos, llega a sentir que se parece un poco. Pero tanto desear agota a cualquiera y el pibe se lamenta, se aparta, empieza a castigar a los más débiles”», relatou Mortensen ao comezo. Acto seguido, animouse a ler en galego un dos seus poemas. «Es una traducción de Yolanda Castaño. Que aprovecho para felicitarte por ese premio», sinalou o artista entre risas e aplausos do público.

O recital continuou con varios textos sacados do seu último poemario, Ramas para un nido. O punto final púxoo Iglesias co son dunha buguina e unha posterior firma de libros. «Só exemplares dos autores. Nada de Tolkien nin de Rosalía de Castro», bromeou Castaño.

Un evento poético que enche o Ágora con artistas internacionais e galegos

O ciclo Poetas Di(n)versos iniciou en outubro a 15. ª edición co recital da luguesa Nieves Neira e a estoniana Kai Aerelei. Os máis dun cento de asistentes presentes nesa sesión recibiron pases directos que aseguraron que ese público que «acode mes a mes ás citas poéticas», sinalan desde o Concello, tivesen un asento reservado para a cita de onte. O resto de prazas ata completar as 530 entregáronse ao día seguinte no Ágora, de xeito presencial e por orde de chegada. Mesmo se crearon dúas quendas para facilitar o acceso aos pases, que se esgotaron en cuestión de horas.