A película ruandesa «The Bride» imponse no festival Novos Cinemas

A pintora, realizadora, guionista e produtora ruandesa Myriam U. Birara (Masisi, Zaire [hoxe República Democrática do Congo], 1992) é a gran triunfadora desta oitava edición do festival pontevedrés Novos Cinemas. A súa película The Bride [A noiva], coa que debuta na longametraxe, impúxose como mellor filme da sección oficial, na que ademais se alzou co premio Xurado Novo á mellor dirección. Así o desvelou este domingo a organización, que deu a coñecer un palmarés no que sobresae outra cinta, An Evening Song (for three voices), obra do director e produtor Graham Swon (Oxnard, California, 1987), que logrou dous notables recoñecementos: o galardón do público e o da crítica. Este último —decidido por Gerard Casau, Jesús Silva e Daniela Urzola— eloxia «a súa singular mirada á tradición do gótico americano a través dunha linguaxe fílmica onde palabra e imaxe se conxugan en equilibrio e por seguir abrindo camiños inusitados no verdadeiro cine independente estadounidense que vindica o valor artesanal».

Integrado por Gloria Benito, Silvia Cruz e Helena Wittman, o xurado da sección oficial tamén concedeu mencións especiais a Peter Pan, de Natacha Samuel e Florent Klockenbring —que converte un conto para nenos nun drama social moderno—, «por elixir non medrar e poder amar a todos», e a There Is a Stone, de Tatsunari Ota, «por conseguir contar un encontro improbable a través de espazos intermedios e momentos de silencio».

O xurado internacional enxalzou a capacidade de The Bride «para transformar unha situación violenta nun emotivo testemuño de amor e solidariedade, empregando unha narrativa aparentemente sinxela que enriquece a historia con destreza e harmonía». Myriam U. Birara aborda o drama social dos matrimonios forzados que aínda sofren moitas mulleres en Ruanda. O premio Xurado Novo á mellor dirección —outorgado por Daniel Filloy, Rebeca Tella, Miguel López, Ash Diz e Laura Somoza— recoñece tamén en The Bride «a evidencia dunha mirada no seu retrato sensible e natural dunha realidade complexa, unha posta en forma impecable e un gran traballo co reparto».

O xurado da sección Latexos —conformado por Ana Matilde Uslenghi, Xan Viñas e Sergio Casteleiro— distinguiu a Zimmerwald, filme de Valeria Stucki (Suíza, 1983), «pola súa aproximación á historia e a súa vinculación co espazo público e como é pensado dende a contemporaneidade, ofrecendo unha perspectiva que cativa».