O Outono Fotográfico premia a Carlos Folgoso

O fotógrafo ourensán Carlos Folgoso Sueiro (Verín, 1982) foi o gañador da décima segunda edición do premio Galicia de fotografía contemporánea co seu proxecto Máis alá do lago. Este certame, organizado pola asociación Outono Fotográfico, conta co apoio da Xunta e da Vicepresidencia da Deputación de Lugo.

Máis alá do lago destaca por ser unha viaxe metafórica polas peculiaridades de Galicia, onde as realidades sociais e políticas se mesturan coas lendas. A fronteira con Portugal tamén está presente neste traballo. Segundo a organización, o proxecto de Folgoso encaixa perfectamente co obxectivo do galardón, ao explorar temas como a emigración, a tradición, os incendios forestais e a dualidade entre forza e opresión.

A dotación do concurso inclúe a produción dunha exposición e a edición dun libro, coa itinerancia da mostra durante dous anos por diferentes cidades galegas, o resto de España e Portugal.

O xurado estivo composto por expertos internacionais como Jokin Aspuru, Elina Heikka e Elisa Noronha, así como polos coordinadores do premio, Xosé Lois Vázquez e Vítor Nieves. Ademais, participaron representantes das institucións patrocinadoras: Aurelia Balseiro, directora do Museo Provincial de Lugo (representando á Deputación de Lugo); e Eva Torres, directora técnica de espazos expositivos e áreas museísticas do Concello de Ourense (en representación da Consellería de Cultura).

A exposición inaugural terá lugar en decembro na sala de exhibicións do pazo de San Marcos, sede da Deputación de Lugo.