Un concerto de The Courettes en Santiago dá inicio á 14.ª edición do Outono Códax

A 14.ª edición do Outono Códax comeza este xoves cun concerto da banda de rock and roll The Courettes, o dúo integrado pola cantante brasileña Flavia Couri (que tamén toca a guitarra) e o baterista danés Martin Couri. Chegan a Compostela cunha proposta que mestura garaje, blues, surf e rock and roll tinguida de amor polo universo de Phill Spector e as melodías de grupos femininos como Ronettes ou Shangri-Las. O recital terá lugar a partir das 20.30 horas no Riquela Club. Co apoio de Bodegas Martín Códax, o festival impulsado por Raíña Productions e A Reixa achegará a Galicia, ata o 23 de novembro, a destacados artistas de soul, jazz, swing e blues. Ademais, o Riquela Club acolle a exposición Calle 52-W. Los rostros del Jazz 1945-1948, que se poderá ver ata finais de novembro, unha selección das fotografías orixinais en branco e negro que o xornalista e crítico musical William Gottlieb realizou nos clubes da rúa 52-West coloreadas por Alfredo Marcos.