O festival Escenas do Cambio regresa do 8 ao 11 de maio para unir nostalxia e utopía

Cultura

montse garcía Santiago / la voz

Pieza «Baunsbak», de Elvi Balboa, que se estrenará en Escenas do Cambio

«Non queremos que sexa un festival, senón unha experiencia», afirma Kirenia Martínez, directora artística de Escenas do Cambio, a cita impulsada pola Cidade da Cultura que celebrará a súa undécima edición do 8 ao 11 de maio. Baixo o título de Lostopía, coa idea de conectar a nostalxia e a utopía, este encontro de teatro, danza e artes do movemento que teñen no seu ADN a aposta pola vangarda medra nun día respecto á pasada edición. Nesta ocasión, contará cunha quincena de espectáculos, incluíndo cinco estreas absolutas, tres delas a cargo de compañías galegas.

Para artellar a proposta desta entrega, a cinco producións galegas uniránselle compañías e artistas chegados desde Alemaña, Australia, Bélxica, Corea do Sur, Cuba, Suíza, Portugal e do resto de España. De feito, máis alá das estreas absolutas, o festival permitirá asistir por primeira vez en España á peza Exposure, unha coprodución que se perfila como unha das obras ineludibles do programa e que une danza contemporánea, tradición afrocubana e cultura hip-hop. Para iso danse a man a veterana compañía Danza Contemporánea de Cuba e o Urban Arts Ensemble Ruhr alemán co son en directo do prestixioso compositor e músico de cinema australiano Ben Frost, que colaborou, entre outros, coa cantante Björk e en traballos audiovisuais de Ridley Scott. Tamén se poderá gozar por primeira vez en España de Worn Out, do grupo coreano Chumpan Yamoou.

Entre as estreas absolutas, pola súa parte, sobresae a da artista galega residente en Barcelona Elvi Balboa, que presentará Baunsbak, na que utilizarán unhas «jumping boots» para conformar unha partitura sonora con cada un dos saltos. Tamén escolleu Escenas do Cambio para presentar por primeira vez o seu traballo a suíza Raissa Avilés, que transformará cancións de amor en actos de resistencia subversiva, eliminando o romanticismo, en La María, o la espeluznante seducción de una canción de amor. Estrearase, ademais, Fuga para o tempo presente, de Nuisis Zobop (Portugal), no que se combina danza e filosofía.

Galicia tamén achega estreas ao festival. Precisamente, coa do Colectivo D'Elas abrirá a programación o 8 de maio. Velaiquich, amoorch! aborda a través das danzas urbanas a tendencia da sobreactualización. Segundo destacou a directora do colectivo, Julia Laport, tamén traballarán cun colectivo de k-pop. Tamén o peche será cunha estrea galega, neste caso con Mercedes Peón, coa peza O intanxible e o non mundo, que só poderá seguirse en liña. «Voume amosar na intimidade, quero falar do mundo e o non mundo», apuntou a artista. O capítulo de espectáculos que se poderán ver por primeira vez péchao Familia Nijinska, de Vacaburra, froito dunha residencia creativa no propio festival que terá como resultado unha conferencia escénica debuxada.

O cartel de Escenas do Cambio complétano Black Through Red e I'm not a Influencer, de Reinaldo Ribeiro; I'm not a Hero, de Fluctus (Suíza); So de Cop, do catalán Arnau Obiols; Roland mon Amour, de Funboa Escénica; e Solala, de Amalia Fernández. O público será o encargado de activar a instalación participativa Ruido, de Ça Marche. Por segundo ano, haberá espazo para o laboratorio-escola Comando Dramatúrxico.

«Escenas do Cambio é un festival xa consolidado, que, ademais de lugar de exhibición, é de reflexión», afirmou o director xeral de Cultura, Anxo Lorenzo, incidindo na relevancia que acada a fidelidade do público nesta cita.